როგორ დავიცვათ თავი გაზის გაჟონვისაგან?

სამყარო სავსეა ხიფათებითა და უსიამოვნებებით. პატარა უყურადღებობას შეუძლია დიდი ტრაგედია გამოიწვიოს... ჩვენ ვალდებულად ვთვლით თავს გაგაცნოთ უსაფრთხოების ის ელემენტარული ზომები რომელიც დაგიცავთ თქვენ და თქვენი ოჯახის წევრებს უბედურებისაგან.

პირველი და უმთავრესი არის გაზის მოწყობილობების და გაზის გაყვანილობის სწორი მონტაჟი. აქ მოქმედებს ერთი მარტივი წესი: გაზის მოწყობილობა უნდა დამონტაჟდეს ისეთ ოთახში რომელიც ნიავდება და გაჟონვის შემთხვევაში, ნაკლებ სავარაუდოა ბუნებრივი აირის დაგუბება და შემდეგი აფეთქება.

მონტაჟი უნდა განხორციელდეს მხოლოდ სერტიფიცირებული სპეციალისტების მიერ, მხოლოდ ხარისხიანი სამონტაჟო მასალების გამოყენებით. ასევე სერტიფიცირებული უნდა იყოს ბუნებრივ აირზე მომუშავე ნებისმიერი დანადგარი: ქურა თუ გამათბობელი უნდა იყოს სერტიფიცირებული და შემოწმებული ადგილობრივი გაზის გამანაწილებელი კომპანიის მიერ. რაც შეეხება გამათბობელს, მას უნდა ქონდეს წვის დახურული კამერა და ავტომატური გათიშვის რეჟიმი. დახურული წვის კამერა უზრუნველყოფს იმას, რომ თუ აირი არ იწვება იგი გამოდევნება შენობის გარეთ. ხოლო ავტომატური გათიშვის რეჟიმი უზრუნველყოფს იმას, რომ თუ მოხდა გაზის მოწოდების შეწყვეტა მისი აღდგენის შემდეგ, არ აღდგება მისი მოწოდება წვის კამერაში. კატეგორიულად დაუშვებელი კუსტარული (თვითნაკეთი) დანადგარების გამოყენება.

სასურველია მოხდეს გაზის და ნამწვავი აირების დეტექტორების გამოყენება. ასეთი დეტექტორი ხმოვანი სიგნალის საშუალებით შეგატყობინებთ გაჟონვის შესახებ. ასეთი დეტექტორი სასარგებლოა იმ შემთხვევაში, თუ მაგალითად სურდოს გამო ვერ გრძნობთ გაზის სუნს.

თუ გაჟონვა მაინც მოხდა, და ამის შესახებ დეტექტორმა გამცნოთ ან აირის სუნი იგრძენით. უნდა იმოქმედოთ შემდეგი სქემით:

1. დაუყონებლივ გახსენით ყველა ფანჯარა და გაანიავეთ ოთახი;
2. ჩააქრეთ ღია ცეცხლის ყველა წყარო;
3. დაუკავშირდით გაზის გამანაწილებელი კომპანიის საავარიო სამსახურს.

ბოლო დროს განვითარებული მოვლენები, ცხადყოფს იმას რომ ამ აუცილებელი ზომების გარდა სასურველია ასევე დამატებითი ზომების მიღება, კერძოდ გაჟონვის წყაროს დადგენა. გაჟონვის წყარო შეიძლება იყოს ორ გვარი: გაზზე მომუშავე ხელსაწყო და გაზის გაყვანილობა. თუ გაჟონვა ხდება ხელსაწყოდან საჭიროა შევუწყვიტოთ მას აირის მიწოდება და სასწრაფოდ გამოვრთოთ იგი. გაყვანილობიდან გაჟონვის აღმოჩენა შესაძლებელია საპნის ქაფის საშუალებით. საჭიროა გადავუსვათ ქაფი გაყვანილობის ელემენტებს, გაჟონვის ადგილას ქაფი დაიწყებს ამობერვას. გაჟონვები ყველაზე ხშირად ხდება მილების დაერთების ადგილას და გაზის ონკანებიდან. დაუშვებელია გაჟონვის შემოწმება ღია ცეცხლის საშუალებით!